مفيش فايدة لان انت اكيد فى مصر

بسم الله الرحمن
الرحيم

نقول الاول السلام عليكم , و اللى
مشغل شريط جديد , او قاعد ياكل او بيقربع كبايه شاى او مج نسكافيه يركنه على جنب
دلوقتى و يركز معايا شويه

احنا هنتكلم عن ام الدنيا يا جماعه , بلدنا
الحبيبه , مصر , ايوه بالظبط اللى بيغنولها بيقولو مصرهى امى

موضوعنا بقى
جميل اوى النهارده , هنعرفك امتى تعرف ان انت فعلا ابن مصر و عايش فيها و بتتمتع
بمياه نيلها , و بشمسها

نبتدى بقى و نعقلها و نتوكل

لما تكون ماشى
فى الشارع , و العربيات بتزنق على بعض عشان تعدى , و انت يا حبه عينى مضطر تشارك
العربيات الصراع ده لان مفيش رصيف , او لان المحلات احتلت الرصيف

يبقى انت اكيد اكيد فى
مصر

لما تروح المدرسه , لا بلاش المدرسه احنا ناس كبار
دلوقتى , لما تروح الكليه بتاعتك , و تلاقى نفسك فى كليه قمه طالع عين ........ ,
قصدى طالع عينك يعنى - مساء الخير يا رقابه - عشان تدخلها و تلاقى السكشن ازحم من
الفصل بتاعك فى ثانوى

يبقى انت اكيد اكيد فى
مصر

ملحوظه : على فكره الزحمه مش دليل على عبقريه الطلبه ,
بل دليل على عبقريه الحكومه المصريه فى انها عايزه اكبر عدد من الطلبه يستفيد من
علم الدكاتره و المحاضرين فى نفس الوقت , لو حصل و تفضلوا و تكرموا و دخلوا
المحاضره او السكشن اصلا

لما تصحى الصبح و تمسك الجرنان , بلاش نقول
الجرنان خلينا نقول الصحيفه , اى صحيفه مش مشكله عشان ميتقالش انى بعمل دعايه , و
تلاقى الاخبار اللى فيها بقالها 27 سنه متغيرتيش

يبقى انت اكيد اكيد فى
مصر

ممكن واحد ذكى و يقولى يا باشمهندس ماهى الصحف راحت
عليها و النت موجود و القنوات المصريه الكتيييييييييييييييير

هقوله و الله
يا ابنى هى هى نفس الحاجات اللى بنسمع عنها من قديم الزمان و سالف العصر و الاوان ,
بس على بابا بتاع المغاره طلعوه معاش مبكر , و
بدل المغاره بقى فى البنوك و بدل
الصره من الدنانير بقى فى حسابات سويسرا

طيب نبعد عن الحكومه , عشان طبعا
انتو عارفين انى بحب الحكومه و بطيعهم فى كل حاجه , طبعا لانى لو معملتش كده هاخبط
دماغى فى اتخن حيطه و انا مش هلاقى اكبر من الهرم فهخاف انى اهده و يتقال عليا
ارهابى بهدد السياحه فى مصر

لما تلاقى الاتوبيس , او المترو لو اسعدك
الحظ انك تزور القاهره و تزور المترو , و على فكره و الله انا بفرح جدا لما بركب
المترو , بحس بتلاحم قوى الشعب الكادحه , و من غير ما حد يفهمنى غلط عشان انا عارف
النوايه , تحس بالالفه و التقارب بين الشعب و بعضه

يبقى انت اكيد اكيد فى
مصر

لما تحب واحده اربع سنين , و بعدها تتعزم على فرحها
عشان فى عريس جاهز جيه من الكويت و شال , و انت متخرج من كليه الطب بقالك سنتين و
مرتبك لسه 150 جنيه و مفيش امل يزيد

يبقى انت اكيد اكيد فى
مصر

لما ابوك يشجعك عشان تتعلم و تجيب درجات و تقديرات
, عشان تلاقى شغلانه كويسه بعد التخرج

و اخوك خريج هندسه , و ابن عمك خريج
طب , و بنت خالتك خريجه الاقتصاد و العلوم السياسيه قاعدين مستنيين قدوم فرج
ربنا

يبقى انت اكيد اكيد فى
مصر

لما تلاقى التليفزيون المصرى اللى بيشترى كل سنه افلام
برقم كبير اوى - انا مقدرش اقوله عشان ميجيليش سكته قلبيه - بيعرضلك افلام نزلت من
اربع سنين فى قنوات تانيه فضائيه و يكتبلك فى الاعلان عن ميعاد الفيلم كلمه " حصرى
"

يبقى انت اكيد اكيد فى
مصر

لما تذكره القطر يزيد تمنها بحجه ان الزياده هتستغل فى
تصليح القطارات لتقليل الحوادث - اللى هى اصلا من واجبات الدوله - فى حين ان اللى
بعتلك قاطرات جديده و صرف على تجديد القطارات دوله عربيه - مش هنقول قطر -

يبقى انت اكيد اكيد فى
مصر

لما كل محافظه تعتز بتراثها و قيادتها و تعمل على
المحافظه عليهم و الافتخار بيهم بكجولتهم و حلق لحاهم عشان يبقوا على الموضه

يبقى انت اكيد اكيد فى
مصر

لما يكون فى دورسينما الحد الادنى للمقاعد فيها 300
كرسى , و فى مساجد مبيدخلش يصلى فيها فى كل صلاه 30 مصلى

يبقى انت اكيد اكيد فى
مصر

لما يكون من حقك انك تقول رايك , و من حق الاخرين
الاعتراض عليه باى وسيله سواء كانت شفهيه - زى المديح المذموم - او عمليه - زى
المصارعه الحره - او مصيريه - زى حبسك فى اوضه الفئران لحد ما الامتحانات تروح عليك
و تعيد السنه

يبقى انت اكيد اكيد فى
مصر

لما تكونى ممنوعه من دخول الجامعه و المول و السينما و
بعض النوادى عشان انتى منقبه

يبقى انت اكيد اكيد فى
مصر

لما يبقى مطلوب منك انك تنزلى فى الشارع و معاكى راجل -
حتى لو عيل عنده 4 سنين بيتقال عليه راجل - عشان محدش يتحرش بيكى بمناسبه العيد
المبارك

يبقى انت اكيد اكيد فى
مصر

لما واحد يسرق من واحد حاجه , و يتقال انه شرف للى
اتسرق منه

يبقى انت اكيد اكيد فى
مصر

[size=18]ملحوظه : مش هنقول اننا قصدنا عمرو دياب و اغنيه الليلا
دى و الاغنيه العالميه Sway

بعد كل ده , يا ترى تفتكر سعد زغلول كان عنده حق
لما قال مفيش فايده ؟

علي فكرة موضوع جميل بيناقش حاجات كتير لازم نحاول نغيرها بس مع احترامي ليك حضرتك بدل متشجع علي تصليح الحاجات دي انت واقف بتتريق والي هايسمعك هايتريق معاك اي نعم ما باليد حيلة لانك قصدي لاننا مش الحكومة او بايدنا زمام الامور فيبقي الوضع كما هوا عليه وعلشان كده يبقي انت اكيد اكيد في مصر

Dx كتب:: علي فكرة موضوع جميل بيناقش حاجات كتير لازم نحاول نغيرها بس مع احترامي ليك حضرتك بدل متشجع علي تصليح الحاجات دي انت واقف بتتريق والي هايسمعك هايتريق معاك اي نعم ما باليد حيلة لانك قصدي لاننا مش الحكومة او بايدنا زمام الامور فيبقي الوضع كما هوا عليه وعلشان كده يبقي انت اكيد اكيد في مصر

هههههههههههههههههههههههه
اولا انا مش بتريق ... ممكن يكون معالجة للمشكلة بشكل تانى
يعنى مثلا بدل ما نتكلم بغلاسة ونضايق الناس ممكن نحسسهم بالمشكلة بشكل يضحك شوية
وبعدين مانت فى الاخر اعترفت اننا اكيد فى مصر
يبقى انا مش غلطانة
عموما ميرسى كتيــــــــــــــر ليك

مهو لازم اعترف ودي حاجة تـتـنـكر مهو احنا اكيد في مصر حد قال ان احنا في السنغال وانا قلت كده في الاخر علي سبيل الفكاهة مش اكتر زي مانتي قولتي بالظبط عموما شكرا لمجهودك

angel of night كتب:

ا بدل ما نتكلم بغلاسة ونضايق الناس ممكن نحسسهم بالمشكلة بشكل يضحك شوية

[/quote]

بالظبط كدة احنا لازم نضحكهم واحنا كمان نضحك وبرده لازم نتريق لانك متعرفش تعمل حاجة اكتر من كدة بس انا عايز اقول حاجة انا عايز ااغير احنا اكيد فى مصر دى واحط مكانها احنا اكيد شعب مصر لان البلد ملهاش ذنب لو كلنا فكرنا صح هنلاقى ان احنا اللى بنعمل لما مثلا نسيب ولادنا يخشو فى مجالات مبيحبهاش هيبقى فين الابداع وبنلوم فى اللى ماسكين البلد طب واللى عايشين فيها هما فين بتعملو ايه او بنعمل ايه عشان نعترض ومستنين ايه من مصر انتو عاملين زى واحد عنده كومبيوتر وقافله وبيقول فين الافلام والاغانى والبرامج والكليبات مش شغالة ليه بقى ؟!!!!!!! وكمان مستغرب ؟؟ دورو الغلط فين هتلاقوه فينا مش فى الكومبيوتر احنا اللى مش عارفين نفتحه مش هو اللى مفيهوش الحاجات دى

بس بجد ياانجل موضوعك جامد واثر عليا فى حاجات كتير ولامنى كمان فى حاجات كتير

ميرسى عالردود الجميلة دى

عايز اقول حاجة انا عايز ااغير احنا اكيد فى مصر دى واحط مكانها احنا اكيد شعب مصر لان البلد ملهاش ذنب لو كلنا فكرنا صح هنلاقى ان احنا اللى بنعمل لما مثلا نسيب ولادنا يخشو فى مجالات مبيحبهاش هيبقى فين الابداع وبنلوم فى اللى ماسكين البلد طب واللى عايشين فيها هما فين بتعملو ايه او بنعمل ايه عشان نعترض ومستنين ايه من مصر انتو عاملين زى واحد عنده كومبيوتر وقافله وبيقول فين الافلام والاغانى والبرامج والكليبات مش شغالة ليه بقى ؟!!!!!!! وكمان مستغرب ؟؟ دورو الغلط فين هتلاقوه فينا مش فى الكومبيوتر احنا اللى مش عارفين نفتحه مش هو اللى مفيهوش الحاجات دى
رد جميل فعلا ودى الحقيقه **************
ميرسى على الموضوع وعلى مجهودك يانجل

شكرا عالرد الجميل ده